«БАГАЧ» АДЗНАЧАЕ ДЗЕНЬ АДЗІНСТВА БАЛТАЎ

Звесткі аб аўтары глядзець тут.

 22 верасня прыхільнікі беларускасці, якіх не спалохала нечаканая непагадзь,  у вузкім коле адзначылі адразу дзве значныя падзеі ў жыцці сьвядомага грамадства – старадаўняе народнае свята ўраджаю “Багач” і Дзень адзінства балтаў. Святкавалі на Капішчы.

 У першую чаргу ўшанавалі камень Следавік з адбіткамі слядоў босых чалавечых ступняў і ног хатніх жывёл.

 Згодна з народнай традыцыяй з саломы змайстравалі чучала казла.

 Яго ў даўніну ў знак удзячнасці за спрыяльнае лета, якое здолела сфармаваць неблагі ўраджай, прыносілі ў ахвяру паганскім багам, гэта значыць, спальвалі. Для таго чучала натыкалі на кол.

 І пускалі на яго “чырвонага пеўня”.

 Затым танчылі і спявалі народныя песні.

 Калі ўсе патрабаванні рытуалу былі выкананыя, можна было спадзявацца, што багі засталіся задаволеныя і налета аддзячаць людзей добрым ураджаем.

*   *   *

 Народы Прыбалтыкі заўсёды ядналіся між сабой. Яны дружна змагаліся з агульнымі нягодамі, якія наканоўвала ім гісторыя. Жамойты змаглі не толькі захаваць памяць аб сваёй дзяржаве – Вялікім Княстве Літоўскім, але і надаць новаму дзяржаўнаму ўтварэнню яе імя – Літва, што не змаглі зрабіць беларусы з-за сваёй нацыянальнай абыякавасці. Супольна народы Літвыі і Латвіі змагаліся з “чырвонай чумой”, якую прынёс чалавецтву бальшавіцкі пераварот 1917 года. І апошнім часам гэтыя краіны выбралі сабе такі шлях развіцця, які вывеў іх па узроўні дабрабыту на першыя месцы сярод былых савецкіх рэспублік. Няхай жа і надалей літоўцы і латышы жывуць так, як самі таго хочуць, а не як патрабуе іх былая “старэйшая сястра”. Гэтым вечарам у знак еднасці па усёй Прыбалтыцы, а таксама ў многіх месцах Беларусі гараць вогнішчы салідарнасці.

 Ведайце, прыбалты, што і ў Лепелі ёсць вашыя аднадумцы і прыхільнікі вашага самастойнага развіцця. За ваша здароўе, сябры!

22 верасня 2018 года.