У БЯРЭЗІНСКІ ЗАПАВЕДНІК ЗАПУСЦІЛІ ЛЬВА

(Пра жыццё)

 У лясы Бярэзінскага біясфернага запаведніка запусцілі Льва. Ён адразу захапіў уладу ў свае рукі. Падпарадкаваў сабе ўсіх звяроў.

 Калі адчуў поўнае вяршэнства над звярыным княствам, выклікаў да сябе самага вялікага Зубра і загадаў:

 - Апоўдні, Рагаты, прыйдзеш да мяне. Станеш маім абедам. Зразумеў?

 - Зразумеў, - пакорліва прамыкаў Зубр і, маркотна прыціснуўшы рогі да карку, паплёўся развітвацца з Зубраняткамі.

 Наступным выклікае Леў тоўстага няўклюднага Мядзведзя і аддае загад:

 - Увечары прыйдзеш да мяне, Касалапы. Будзеш мне вячэрай. Зразумеў?

 - Зразумеў, - лісліва прарыкаў Мядзведзь і, знямелы ад непазбежнасці хуткай смерці, падаўся ў пушчу апошні раз памілавацца з Мядзведзіцай.

 Чарговай ахвярай Леў выбраў Ваўка. Выклікае і загадвае:

 - Шэры, з узыходам сонца каб быў у мяне. Пойдзеш мне на сняданак. Зразумеў?

 - Зразумеў, - як мага лагодней правыў Воўк і скіраваўся ў калгасны статак, каб апошні раз паласавацца смачным Цялём.

 На наступны дзень сыты Леў выклікае тлустага Зайца і, аблізваючыся ад уяўлення хуткай асалоды, загадвае:

 - З зыходам расы прыйдзеш да мяне. З цябе атрымаецца смачны полудзень. Ты, Касы, зразумеў?

 - Зразумеў, - дрыжачым голасам адказаў Заяц. – А пытанне можна?

 - Можна, - дазволіў леў.

 - А ці можна не прыходзіць?

 - Можна, - абыякава рыкнуў леў і скіраваў ганца па Лісу…

16 ліпеня 2018 г.