ДЗЕЙНАСЦЬ КАМУНАЛЬНІКАЎ ПА ЎЛАСНАЙ ІНІЦЫЯТЫВЕ І ПА ЗАЯЎЦЫ

 Пад маім акном з´явіліся камунальнікі. Разбурылі гнілую пясочніцу і ўсталявалі новую. Пасля сябе прыбралі старызну. Зрабілі гэта па ўласнай ініцыятыве. Хвала ім за гэта. Застаецца толькі чакаць, як яны схамянуцца па маёй ініцыятыве, сфармуляванай у электроннай заяўцы, якую падаў у ЖКГ 2 жніўня.

Сунасць звароту ў тым, што падчас пракладкі оптавалаконнага кабелю мінулай восенню, сувязісты разбурылі асфальт, выкапалі канаву, паклалі кабель, засыпалі зямлёй, якая з часам асела і ўтварыла яміны, што перашкаджаюць руху транспарту і пешаходаў, у непагадзь ператвараюцца ў балота.

 Жыхары дома №13 чакаюць абяцанага рамонту двара з 2011 году, таму абяцанкам зрабіць яго не вераць, а просяць у такім выпадку зрабіць хаця б часовы рамонт канавы над кабелем. 

  Гэта не першы мой зварот адносна паказанай канавы. 30 чэрвеня я патэлефанаваў на прамую лінію са старшынёй райвыканкаму Барысам Яфрэмавым і задаў пытанне: сувязісты ці камунальнікі павінны прыводзіць заасфальтаваны заезд у парадак. Абяцаў разабрацца.

 З ЖКГ я павінен атрымаць адказ на працягу месяца - так мяркую. Пакажу яго змест і распавяду аб выпраўленні хіба, калі такое адбудзецца. А калі не адбудзецца, то ўсё адно распавяду.