ШКОЛЫ АДЧЫНІЛІ ДЗВЕРЫ…

 Радасная навіна, ці не? Гледзячы з якога боку на яе зірнуць. Дзеці на год падраслі. На клас паразумнелі. Апрануліся ў абновы. Гэта радасныя акалічнасці. А як далася тая новая апратка? Пасля такога пытання знікае радаснае зіхаценне на тварах матуль: на хлопчыка ці дзяўчынку пайшлі каласальныя для сямейнага бюджэту сродкі. А калі вучняў двое? Горкі ўздых вырвецца з грудзей мамы.

 У Наташы Аніскінай вучняў аж трое. Старшыня Лепельскай раённай арганізацыі інвалідаў Уладзімір Кніга з далікатнасці не задаваў матулі пытанне адносна расходаў на зборы дзяцей у школу, а ўручыў сям’і школьнікаў грашовую падтрымку ў памеры дзвюх базавых велічынь. Пасля спытаў:

 - У які клас будзеце хадзіць сёлета?

 - У першы, - першым адказаў Максім.

 - У трэці, - зазначыў Кірыл.

 - А я ў пяты, - з гонарам канстатавала Хрысціна.

 Падтрымаў шматдзетную сям’ю прадпрымальнік Мікалай Лебедзеў.

2.ІХ.2019.