ЯК ЗНАЙСЦІ СЛЕДАВІК

Вандроўныя нататкі старога валацугі

Часта даводзілася чуць, як безвынікова шукалі камень-следавік, арыентуючыся на ўказальнік на дарожным знаку, пастаўленым збоку Аршанкі насупраць вёскі Залессе. Справа ў тым, што першапачаткова дарожны знак “Славутасць” стаяў за паваротам на Следавік. Таму шукальнікі траплялі не на той лапік поля. Сёлета знак перанеслі на патрэбнае месца. Камень з адбіткамі чалавечай нагі і слядоў хатняй жывёлы трэба шукаць наступным чынам.

Перад адгалінаваннем ад Аршанкі дарог на асфальтавы завод і вёску Залессе стаіць дарожны знак “Славутасць” з надпісам “Камень-следавік”.

Насупраць адгалінавання, за прыдарожнымі дзвюмя соснамі, ёсць правы з’езд на вузкае поле.

За полем паралельна Аршанцы пралегла паласа кустоў. У ёй прыкметны прагал. Трэба кіравацца на яго. Далей праезду няма.

Там перайсці канаву. Насупраць праз якіх паўсотні метраў пачынаецца перпендыкулярная ёй паласа хмызу. Абысці яе справа і рухацца полем паралельна ёй так, каб кусты заставаліся злева. Прапусціць адзін прагал у іх з ракітай на мяжы поля.

Перад канцом кустоў адразу кінецца ў вочы прагал, і ў ім будзе бачны Следавік. Усяго ад Аршанкі не болей за паўкіламетра.

Вось і прыйшлі на Следавік. Гэта вясною ён плавае ў балоце, а ўлетку ля яго качацца можна.

А да лета не забывайцеся абуць гумовікі.